Кафедра туралы ақпарат


Елбасының: «Қазақстанға үштұғырлы тіл қажет, ол – еліміздің жарқын болашағының кепілі» – деген тапсырмасын жүзеге асыру мақсатында заман талаптарының сұраныстарына сәйкес университетте филология факультетіне қарасты Базалық негізгі және екінші шетел тілдері кафедрасы 2006 жылы құрылды.

01.09.2007 ж.Шетел тілдері кафедрасы Қазақ мемлекеттік қыздар педагогикалық университеті ректорының 24.08.2007 жылғы №109 бұйрығына сәйкес құрылған Шетел тілдері факультетінің құрамына енді.

2006-2009 жылдар аралығында кафедра меңгерушісі қызметін республикаға белгілі ғалым, педагогика ғылымдарының докторы, ҚР Білім беру ісінің үздігі, ҚР Білім беру ісінің құрметті қызметкері, республикалық PhD диссертациялық кеңестің мүшесі, «Қазақстан мектептеріндегі шетел тілдері», «Шетел тілін оқыту әдістемесі», «Педагогика және өнер» журналдарының бас редакторы Бәйнеш Шолпан Борантайқызы атқарды.

2009-2010 жылдары конкурс негізінде кафедра меңгерушісі болып бірнеше оқу құралдарының авторы, п.ғ.к., доцент Ешімбетова Забира Бердібекқызы сайланды.

2010 жылдан кафедраны Қазақстан Республикасы оқу ісінің озаты, Қазақ мемлекеттік қыздар педагогикалық университеті тағайындаған Б.Бөлтірікова атындағы стипендияның иегері, п.ғ.к. Нұрланбекова Ерия Қашқынбекқызы басқаруда.

Осы жылдар аралығында кафедра ұжымы ғылым кандидаттарымен, магистр-оқытушыларымен толықты. Кафедрада тәжірибе алмасу және әлемдік білім кеңістігіне ену үшін алыс-жақын шетелдік ЖОО-мен, тіл орталықтарымен бірлескен әрекет мақсатында тығыз байланыс орнатылды. Сондай-ақ студенттерге тілді терең меңгерту үшін тіл орталықтары: Шыңжаң ұйғыр автономиялық ауданы төрағасының орынбасары Жин Но ханымның қатысуымен Қытай тілі орталығы (2011 ж.) Түркия Республикасы елшілігі білім бөлімі мен Іскер топтар қауымдастығының қолдауымен №307 кабинет «Түрік тілі» дәрісханасы (2011 ж.), Елші Құрбани Сейфи мырза, ИИР Төтенше және өкілетті елшісінің мәдени кеңесшісі әрі Иран мәдени орталығының директоры Асғар Собери мырзаның қатысумен «Парсы тілі» орталығы мен дәрісханасы (2012 ж.) ашылды.

ТОМЕР түрік тілі орталығынан келген оқытушылар 2009-2010 оқу жылында PhD Енвер Капаган, магистр-оқытушылар Уйгар Курум (2010-2011 жж.), Мазғар Сығлан (2011-2012 жж.), Эркан Гюрбус (2012-2013 жж.) қызмет атқарса, 2012 ж. Нийде университетінің ғалым-профессорлары Хикмет Кораш және Фарук Чолак «Түрік тілінің шығу тарихы», «Түрік әдебиеті дәуірлері» тақырыптарында (30 сағ.) дәріс оқыды. ИИР мәдени орталығы 2013 жылы кафедра меңгерушісінің шақыртуымен Нью-Джерси Университетінің (АҚШ) профессоры Джон Пеннелло, Лакнау университетінің (Үндістан) ағылшын-парсы тілдері бөлімінің бастығы, PhD,профессор Ариф Аюбий іскерлік байланыс, шетел тілін оқытуда білім берудің заманауи технологиялары мен жаңа әдістерін қолдану, тәжірибе алмасу мақсатында оқытушылар мен студенттерге шеберлік сыныптар жүргізді. Парсы тілі оқытушылары Тегеран университетінің профессорлары Али Хоземи (2011 ж.), Мехти Ходододион (2012 ж.), PhD, профессор Хуссейн Новин (2013 ж.) студенттерге оқу материалдарын жете меңгертуге, коммуникативтік дағдылары мен танымдық іс-әрекеттерін дамытуға бағытталған тәжірибелік сабақтар өткізді.

2011 ж. VII Қысқы Азия ойындарына кафедраның 3 оқытушысы мен 60 студенті «ерікті аудармашылар» ретінде қосқан үлесі зор.

Кафедра 2011 жылы шетел тілдері факультетінің оңтайландырылуына байланысты қайтадан Қазақ филологиясы және әлем тілдері факультетінің құрамына енді.

Кафедраның материалдық-техникалық базасы, оқу дәрісханалары (Ағылшын тілі, Түрік тілі, Қытай тілі, Парсы тілі) заман талабына сай жабдықталды.

Кафедраның оқытушылары университетішілік жаңа жүйеге сәйкес оқу үдерісіне заманауи ақпараттық технологияларды енгізуге атсалысты; оқытудың әдіснамалық аппараттарын жаңартты, инновациялық оқыту технологияларын меңгеруге ден қойды; компьютерлік технологияларды енгізді (дәріс, практикалық сабақтарында проектор, слайд, презентациялар қолданысқа кіре бастады), әдістемелік семинар өткізу арқылы басқа ЖОО оқытушыларымен тәжірибе алмасты (КИМЭП, Абылай хан атындағы ҚазХҚжӘТУ, әл-Фараби атындағы ҚазҰУ, ҚазБСҚА, СДУ).

2010 ж. 24 қарашада кафедраның ұйымдастыруымен КИМЭП жанындағы тіл орталығының профессорлары Дэвид Лэндис, халықаралық қатынастар жөніндегі директор Роберт Воогт, ассистент Э.Сулейменова және Макмиллан баспасының Алматыдағы өкілеттілігінің өкілі Н.А.Куратованың қатысуымен «Шетел тілдерін ақпараттық жаңа технологиялар арқылы оқыту» атты оқу-әдістемелік семинар өтілді.

«Оқулық» республикалық ғылыми-практикалық орталығында кафедраның 8 оқытушысы п.ғ.к. Е.Қ.Нұрланбекова, Ұ.Р.Қансеитова, аға оқытушылар Қ.Ж.Тұрсынбаева, С.Қ.Қасқырбаева, Ы.Н.Бердешова, магистр-аға оқытушы С.Қ.Рахымжанова, магистр оқытушылар М.А.Джамбулова, С.А.Ыдырысова сараптамашы болды.Сараптама жұмысына белсене қатысқаны үшін Е.Қ.Нұрланбекова,Қ.Ж.Тұрсынбаева   «Алғыс хатпен» марапатталды. Аға оқытушы Қ.Ж.Тұрсынбаева   Ұлттық Бірыңғай Тестілеу орталығында тест тапсырмаларының әзірлемешісі, ҰБТ-де апелляциялық комиссия мүшесі, сондай-ақ ҰТО сараптамалық комиссия мүшесі қызметін атқарады.

2011 ж.аға оқытушы Г.Сабырданқызының (авторлық бірлестікте) Қытай Халық Республикасы Шинжияң оқу-ағарту баспасынан «Қытай тілі (жалпыға арналған)» атты оқулығы (12,5 б.т.), СD дискімен жарыққа шықты.Оқулық оқу үдерісінде қолданыста.

Кафедрадағы оқытушылардың студенттерге білім беруімен қатар, ғылыми жұмыстары да нәтижелі болды. Мәселен, аға оқытушы Ғ.Ә.Мұқашеваның «Образование части речи. По способу конверсии в английском языке// Сборник ППС кафедры английской филологии РТСУ. Выпуск VI. Душанбе (2013 г. 158-166 стр.), HooshangGulShiri: The Poet of Modern Era // Lucknow University Journal of Humanities. ISSN No. (print) 097 – 8105&ISSN No. (Online) (0974-8113. 2013)» атты мақалалары жарияланды.

2011 ж.30 маусым күні Шыңжаң педагогикалық университетімен арадағы байланысты нығайту мақсатында Қытай тілін оқыту орталығы ашылды. Бұл орталықтың тұсауын университеттің сол кездегі ректоры Ш.К.Беркімбаева мен Шыңжаң ұйғыр автономиялық районы төрағасының орынбасары Жин Но ханым кесті.

Салтанатты жиынды ашқан Шәмша Көпбайқызы университет тарихымен таныстыра келіп: «Біздің университет Шыңжаң педагогикалық университетімен екі елдің білім саласын дамыту мақсатында, ғылыми-мәдени ынтымақтастық орнатуда біраз шараларды іске асыруда. Бұл ҚР Президенті Н.Ә.Назарбаев пен Қытай Халық Республикасы төрағасы Ху Цзинь Тао жүргізіп отырған көршілес екі мемлекеттің бейбіт саясатының жемісі. Біздің университеттегі бүгінгі басты оқиға қытай тілін оқыту орталығының ашылуы. Жаһандану заманында жастардың көп тілді меңгеруі, әлемдік бәсекеге бейім болуы — заман талабы. Мәселен, университеттің филология факультеті студенттерінің қытай тіліне деген қызығушылығы өте жоғары. Қазірдің өзінде екі жүзден астам студент қытай тілін үйренуде. Бүгінгі Қытай тілі орталығы студент жастарға қытай тілін үйрету арқылы қытай мәдениетін, дәстүрін, тарихын танытады. Орталықты жабдықтауды толығымен қытай әріпестеріміз ұйымдастырды. Бұл — көрші екі ел жастарының достығын нығайтудағы игілікті іс» —деді.

Егер сайттан қате тапсаңыз, қате мәтінді белгілеп Ctrl+Enter пернесін басыңыз.