Студенттер арасында футзалдан әлем чемпионаты өтеді

АЛМАТЫ. 10 тамыз. Qyzdar_Ýnıversıteti – Биылғы жылдың 19-26 тамыз аралығында Алматы қаласында студенттер арасында футзалдан әлем біріншілігі өтеді. Жаһандық айтулы спорт додасы ТМД елдері ішінде тұңғыш рет Қазақстанда өз байрағын көтермек.

Қазақстан Республикасының студенттік спорт федерациясы және Ұлттық студенттік лигасы мұрындық болған бәсекеге әлемнің жиырмадан астам мемлекетінің студенттік құрамалары қатысады деп күтілуде.

Бұл чемпионатта ерлердің 16 және әйелдердің 9 командасы күш сынасады. Ерлер сайысында Қазақстан «В» тобында өнер көрсетеді. Топтық турнирдегі қарсыластарымыз – Чехия, Беларусь және Жаңа Зеландия құрамалары. Атап айтқанда, жарыс жолында Қазақстан, Франция, Ресей, Қытай, Украина, Чехия, Израиль, Болгария, Хорбатия, Польша, Германия, Словакия, Португалия, Жаңа Зеландия, Беларусь және Аргентина сынды мемлекеттердің командалары өзара мықтыны анықтамақ.

Осы орайда айта кетейік, біздің топтағы командалар арасында Еуропа құрлығының өкілдері өте мықты. Мәселен, 2014 жылы Испанияда өткен студенттердің әлем біріншілігінде Беларусь құрамасы қола медальді иеленсе, 2016 жылы Бразилияда өткен жарыста Чехия ойыншылары да дәл сол межеден көрінді. Яғни, айтулы мемлекеттің өрендері дүбірлі додаларда жеңістің дәмін татып үлгерген. Бұл жолы да жүлделі орындардың бірін иелену үшін олардың еш аянып қалмайтыны анық. Десек те байрақты бәсеке өз елімізде, өз жерімізде, өз жанкүйерлеріміздің көз алдында өтетіндіктен біздің аяқ доп шеберлері де намысты қолдан бермей, жеңіс тұғырына көтерілу үшін барын салуға тиіс. Студенттер арасындағы әлем біріншілігінің тұсауы 1984 жылы Бразилияның Сан-Паулу қаласында кесілді. Бұл дүбірлі дода алаң иелерінің жеңісімен аяқталды. Финалда олар Парагвай құрамасын 5:4 есебімен ұтты. Қола медальді Испания иеленді. Үшінші орын үшін тартыста Пиреней түбегінің түлектері Италиядан 7:6 есебімен басым түсті. Осының алдындағы студенттердің әлем біріншілігі 2016 жылы Бразилияның Гояна қаласында ұйымдастырылды. Бұл жарыстың ақтық сайысында алаң иелері Ресейді 2:1 есебімен ұтты. Ал қола медаль үшін бәсекеде Чехия құрамасы Францияны 11:3 есебімен басым түсті.

Әйелдер арасындағы жарысқа келер болсақ, 2008-2016 жылдар аралығында дүниежүзілік дода бес рет ұйымдастырылып, солардың барлығы да Бразилия аруларының айқын жеңісімен аяқталды. Сонымен қатар, жүлделі орындарды иеленгендер арасында Португалия (2 күміс+1 қола), Испания (2 күміс), Ресей (1 күміс+2 қола), Қытай (1 қола)  және Иран (1 қола) сынды елдердің өкілдері бар.

Оңтүстік астанадағы байрақты бәсекеде Қазақстанның сұлулары «В» тобында өнер көрсетеді. Қарсыластарымыз – Португалия, Франция және Жаңа Зеландия құрамалары.  «А» тобында Ресей, Канада, Украина, Израиль және Польша құрамалары күш сынаспақ.

Әлем чемпионаты Халықаралық студенттік спорт федерациясы, Қазақстан Республикасының студенттік спорт федерациясы мен Ұлттық студенттік лига арасында жасалған өзара келісімге сәйкес өткізіледі.

Сонымен қатар, ұйымдастыру алқасының құрамында ҚР Білім және ғылым министрлігі, Мәдениет және спорт министрлігі мен Алматы қаласының әкімдігі бар.

Айта кетейік, 2014 жылы құрылған Ұлттық студенттік лиганың негізгі мақсаты – жастар арасында салауатты өмір салтын ұстануды дәріптеу, елімізде спорт ойындарын кеңінен тарату. Қазіргі күнде Ұлттық студенттік лига Қазақстанның барлық жоғары оқу орындары мен орта арнаулы білім беру ұйымдарын біріктіре отырып, жастарды спортпен айналысуға шақырады.

 BASPASÓZ JÁNE QOǴAMMEN BAILANYS BÓLIMI

Tel.: 8 (727) 247-00-07

e-mail: kyzdaruniversity@gmail.com

facebook: qyzdaryniversiteti

vkontakte: qyzdar_yniver

instagram: qyzdar_yniversiteti

youtube: qyzdar уniversiteti